Biblia/Nove Testamento/Juda

Juda

Salutation

¹De Juda, servitor de Jesus Christo e fratre de Jacobo, a illes qui es vocate e amate per Deo le Patre, e preservate per Jesus Christo. ²Que misericordia, pace, e amor sia date a vos con abundantia.

Condemnation del false magistros

³Carissime amicos, benque io esseva preste scriber vos con omne sollicitude in re nostre commun salvation, io sentiva le necessitate de scriber vos deprecante^[1] vos combatter vigorosemente pro le fide que esseva semel^[2] pro semper transmittite^[3] al populo sancte^[4]. ⁴Proque se infiltrava inter nos certe homines, cuje sententia de condemnation^[5] esseva olim scribite - homines impie, que transformava le gratia de nostre Deo in licentia de libertinage e denega nostre unic soveran e Senior, Jesus Christo.

⁵Ora, a vos io desira rememorar (benque super iste factos jam vos esseva plenmente informate) que le Senior, depost haber salvate semel pro semper le populo de Israel retrahente lo del terra de Egypto, plus tarde habeva facite morir illes qui non habeva credite. ⁶Vos sape alsi que le angelos que preterpassava le limites que les esseva assignate e que derelinqueva lor domicilio, esseva relegate con catenas eterne in complete obscuritate e reservate al judicamento del grande Die. ⁷Sicut Sodoma e Gomorra con le citates circumstante, indulgente in immoralitate sexual^[6] e persequente desiros innatural in modo simile a iste angelos, sustenente le pena del foco eterne, deveniva pro nos exemplar.

⁸Nonobstante isto, iste homines^[7], como resultatos de lor sonios, defila lor corpores^[8], rejecta le autoritate^[9] del Senior e blasphema^[10] le Esseres gloriose. ⁹Ma mesmo quando Michael, le archangelo, altercava con le diabolo e disputava con ille in re le corpore de Moses, ille non hardiva pronunciar contra ille sententias injuriose, e le diceva solmente: “Que le Senior te reprocha!”. ¹⁰ste homines, totevia, como animales irrational, non comprende le cosas que illes calumnia, e se corrumpe con lo que illes deberea comprehender instinctivemente. ¹¹Guai a illes! Proque illes percurre le via de Cain e, a causa de lor aviditate, se abandonava al error de Balaam; hinc, illes certemente perira in le rebellion de Korah. ¹²Iste homines es como periculose scolios^[11] a vostre agapes^[12]; illes festea sin reverentia e nutre^[13] solmente se mesme. Illes es nubes sin aqua, pulsate per le vento; arbores autumnal infructuose, morte duo vices^[14], eradicate^[15]. ¹³Illes es fluctos impetuose del mar, spuente como spuma lor proprie vergonia; stellas cadente^[16] pro le quales ha essite reservate le complete tenebras del obscuritate eterne.

¹⁴Ora, Enoch, le septime inter le descendentia de Adam, mesmo prophetisava de illes dicente: “Ecce, le Senior va venir con le milles e milles de su sanctos ¹⁵pro executar le judicamento contra omnes e condemnar tote le impios pro tote le impietates que habera committite e pro tote le parolas insolente que iste impie peccatores habera pronunciate contra ille^[17]”. ¹⁶Istes es murmuratores, querelatores que vade ubicunque lor concupiscentia les conduce, e illes face discursos emphatic, seducente personas pro interesse private.

Exhortationes

¹⁷Ma vos, carissime, face memoria de lo que prediceva le apostolos de nostre Senior Jesus Christo. ¹⁸Illes diceva vos: “Al fin del tempores il habera impostores que vivera secundo lor proprie desiros impie^[18]”. ¹⁹Iste gente solmente crea divisiones, illes es mundan e non ha le Spirito. ²⁰Ma vos, carissime, edificante vos ipse super le fundamento de vostre santissime fide, prega pulsate per le Spirito Sancte; ²¹conserva vos in le amor de Deo, expectante le misericordia del Senior nostre Jesus Christo que porta vos al vita eterne. ²²De illes qui dubita habe pietate. ²³Salva alteres attrappante les ex le foco; del alteres sia misericordiose, ma sia multo caute, odia mesmo lor vestimentos^[19] maculate de desiros carnal.

Benedictiones final

²⁴Ora a ille qui pote conservar^[20] vos sin peccato e presentar vos irreprehensibile e plen de gaudio al presentia de su gloria, ²⁵al Deo unic que salva nos per le medio de Jesus Christo, nostre Senior, sia gloria, majestate, imperio e potestate, ante omne seculos, nunc e in omne seculos. Amen.

Notas

1. O “incoragiante”.
2. Un vice.
3. O “committite”, “confidite”.
4. Let. “al sanctos”.
5. O “judicamento”.
6. O “fornication”.
7. Le false magistros.
8. O “carne”.
9. O “soveranitate”.
10. O “insulta”.
11. Benque σπιλάδες (spilades) es frequentemente traducite “mendas” o “maculas”, illo es de facto un traduction del termino grec σπίλοι (spiloi). Le duo parolas es multo simile, specialmente in lor radice o formas lexical (σπιλάς [spilas] e σπίλος [spilos] respectivemente). Il ha hic probabilemente un subtil joco de parolas. Le termino σπιλάς esseva sovente empleate como simple rocca, benque normalmente associate con un rocca longe le costa o emergente del aqua. Assi, le false maestros pare “roccas” (o columnas del communitate christian, cfr. Mattheo 16:18; Galatas 2:9), quando, in realitate se un cristiano se approxima troppo a illes, su fide risca de naufragar. Iste homines es periculose proque quando alicuno se approxima a illes, pensante que illes es “roccas” e “columnas”, illes se revela scolios periculose.
12. O “festas de amor” in le ecclesias antique includeva le celebration del Cena del Senior, le culto e le inseniamento.
13. O “pasce”.
14. Como in Revelation 20:6, qui moriva duo vices mori sia physicamente sia spiritualmente. Cfr. Revelation 20:5; Johannes 3, 11.
15. O “displantate”.
16. O “errante”.
17. Forsan un citation ab le libro pseudoepigraphic de 1 Enoch reportate del tradition oral.
18. Cfr. 2 Petro 3:3.
19. Lett. “tunicas”.
20. O “guardar vos del cader in peccato”.