სულიკო (მამანტი კვირტია)
(Redirected from სულიკო'')
ჸოროფილიში საფულეს
ბგორჷნდი, მუშე ფუბლიკო,
გილებში ნგარა - ღურღულით
„სო რექ სი, ჩქიმი სულიკო.“
ძიგირონც პირი ქობძირი
თი ომბოლს მოკოდ გულიკო;
გურაბაძგილო ქობკითხი:
„სი ხოლო ვარექჷ სულიკო?“
ფურცელონც მაბშალია რდჷ,
ხიოლით მოკოდ ბჯუნიკო,
ქიმუჰამე დო ქობკითხი:
„სი ხოლო ვარექჷ სულიკო?“
ქიმმოხვამილუ ოჸიას,
დიქანცუ, ქიდიხვარხვალუ...
ცაშმარწკიმდეფი ჟინიში
ჩილამურც გაიშახვარჩალუ.
ქიდიხვართქალუ მაბირექ,
პირცჷთ ქაცვანგჷ თექია...
ქოთ კუსუ, ქოთ ქოღურჭულუ:
„იახა, მა ვორექია!“