აკაკის, გამა გვიანი.I ვარიანტი
«ნინას გიწონე, ფშაველა,
მოლერსეს მაღალ გვალაში,
მარგალიტეფს თას - მაფირქუ
მაკითხეშ მუნაწიაში.»
აკაკი
ფიქრეფი მიანდანერუ,
მუ გამა ეკიფშქვიკონი,
სქანო, მოხურგეგ, მოლერსე
სერეფ დღათ ვეგოფშქვიკონი.
სიტყვაქ თეშ ვეკმარაგადუ
ზარ-ხუმაქ, ვეგმანთხუკონი,
იჸუაფუდ მუ, ნინაშე
საგამოქ ვემერტუკონი,
თეზუმას ვადმაღონენდუ
ხორუაქ აკომცუკონი.
მარგალიტეფიშ მომინჯე
ანთარ ჟინქ გუმაჭყორკონი?
დო ჩქიმი უშნო ნინათი
შობელს მუ ვაგვაგიკონი?
მაფშალიაშა ღურჭული
მიქ ოკო დამწონუკონი?
მომარგალიტექ ნინა მა
ძალ-ღონეთ მიბხვარეკონი,
ბთასი დო კარი ყორ-ხურგო
ევოგ დო ებხურგეკონი.
იშენით თინა იჸიდუ,
ტყურეფი ჩუთხინეკონი.
ეგებ მა ნინა ჩქიმითი
ოჸუნე დუაღონკონი?
ნარტეფს სუალეფ ჩვუთხინე,
დუვაჭყორ, დუვამონკონი?
ურგებლობაში მიზეზო
ფშავლობა მირჩქინუკონი,
გვალაშე მოჩუქებული
ბორიაქ გეგმაბორკონი?
თე ჰანგის მუშენ ვალუმანგ
ვამიჩქ, ბუნება რზენიში?
თაქით სო თურეფ მიკვორეთ,
შურ მონთხნა პეულეფიში,
ოხვამერ ხატო, ოჸუნე
ვარენო გვალარეფიში?
ვარ, გვალურ ნინას ორკუნო
სიმტკიცა კირდსალეფიში?
ეგება, ჯილოს ვაგარდას
სინაზე კაბამეფიში?
თეშ გურშენ ინახვერუნო
ონთირალ მალწყარეფიში?
კოჩ მოჩიარი, მოგინე,
სიკურცხა თოლ-ფიჭვეფიში
თეცალ ანბეში მოაკანს
შიშ გომდირთ თი მუნჯეფიში
იშენ დო მიწიმენიმუქ,
ვამოკეხ მოშარეფიში,
ნინა გურხატო აწმორე
მოგვალე, მოზენეფიში,
ვაბწონე, ფერაფ ვენორე,
ქორედა მოთურეფიში
ვოთაყვანუქ დო მითიებ
თინეფიშ ტკვილ-ნწარეფიში
მა შხვა მაფირქენს, გვარუმუ.
მოჩხორიეფი ცეფიში,
ნოხორო გინმაჩქუმალარ
ოჸუნე, ხორუეფიში
დომინგარდანი, მით მონნა
ა, ჯერღვი, ჩქიმ ფირქეფიში,
ვადომიშქურდათ, ვაგონნა
კიჟინი გვალ-ბუსქეფიში.
1919 წელი.