Чавайн Сергей Григорьевич
Сергей Григорьевич Чавайн — марий калыкын ик эн йӧратыме писательже. Тудо шочмо йылмына дене сылнымутан произведенийым эн икымше возаш туҥалын, марий литературлан чапле негызым ыштен. Садлан илымыж годымак тудым марий сылнымутын пионерже да классикше манын пагален лумденыт.
Сергей Григорьевич Чавайн (чын фамилийже Григорьев) 1888 ий 6 октябрьыште шочын. Шочмо верже - Царевококшайский уезд, Себе-Усад волостьысо Изи Корамас ял (кызыт Морко район).
1904 ийыште, Унчо кок классан школым тунемын пытарымеке, С. Чавайн Озаҥ оласе учительский семинарийыш пура. Тушто руш классик-влакын творчествышт дене лишкырак палыме лиеш. Варажым шке гычат возаш кумыланеш. Первый почеламутшо «Ото» маналтын. Тудым варажым шуко йылмышке кусарыме.
Семинар деч вара марий яллаште, кундемна деч ордыжтат туныктымо пашаште тырша, яра жапшым творчествылан ойыра. 1920 ийлаште тудо журналист, редактор семын шуко пашам ышта. 30-шо ийлаште шуко ойлымашым, поэмым, пьесым воза. Нунын коклаште «Йыланда», «Мукш отар», «Акпатыр», «Элнет» произведенийже-влак кызытат кумдан чапланат. Шуко возымыжым вес йылмышке кусарыме.
С. Г. Чавайн йоча-влакланат ятыр возен. Нунын коклаште почеламут, ойлымаш, мыскара орлаҥге улыт. Марий книга издательстве шуко гана посна сборник дене савыктен луктын.
Одарланен кушшо пушеҥге гай творческий корныжо 1937 ийыште лугыч лийын.