Колхозонь эряф/1940/05/Он

by авторсь: Шевченко, Тарас Григорьевич, мокшекс ётафтозе: Чекашкин, Андрей Яковлевич

  Т.   Г.   ШЕВЧЕНКО

---

ОН^[1]

КОМЕДИЯ

Дух истины, его же мир не может прияти, яко не видит его, ниже знает его.

Иоан.  гл.   14,  ст.   17.

 

Сонцень доляц ули всякайть,
Кицка кели якамс:
Конац строяй, конац срафни,
Конанц аньцек сяка
Тевоцка, светть эзга юрги
Коста б мода няемс,
Штоба эстейнза ускомс,
Шобда калму сявомс;
Конац совозьфтема салси
Эсь кудсонза свадонц,
А тя салаване шовай
Пеель печкомс брадонц;
Кона сятявня, аф сими,
Ащи сон шкайть инкса.
Колай катокс малазт эци,
Учи кальдяв пингцень,
Штоба кенженянзон пезфтамс
Потмозт, эхянь максозт: —
Эняльдихть рьвяце, иттне —
Пощада аф максы;
Тона добрай, аф ужяльдезь
Церькафт строяй, пряды,
Родинанцка пяк сон кельгсы,
Муцяй мяк эсь прянцка;
Да сонь эздонза, роднойнять,
Потяй келдакс веронц!..

И перьф пяльге кашт аф молихть,
Ваныхть, кода верост,
Корхтайть: „Катк ни, тият мезе!
Видна, тяфтак улемс!“

— Тяфтак эряви! Тя сяс, мес
Шкай аш, ашеськ куле.
Кепафокс тинь эрятада,
Тяфта тона шиса
Рай тинь штоли ёратада,
Ашель рай! Аф ули!
Вай, ужяль, досадна тейне!
Варжакстода: светса
Сембе, оцязорсь аль беднайсь —
Адамонь, Евань идьсна!
Сявок, тявок... Мезе мон жа?
А вов мезе ёран
Азомс, ломатть: пиравандан,
Фалу кштиян-моран;
Тейнть тошна! Аньзятада,
Аф кульхтядязь тинь мон!
Тяда сюце! Эсь верозень
Мон симан, аф тиннеть.
Фкя веня ваксканяст заборхнень
Мон пирста шаштонь саста,
И куду молемс тяфта
Эсь мархтон иредьста мон корхнень.
Монь идне аф авардихть мельган,
Аф сюци рьвязе;
Бта райсан, тёждя прязе,
И сембось пара перьфкан монь, —
И мяштьсон и семьясон,
Ну, мадонь комляв пряса;
А кеме комлявть удомац,
Тон пушкаса хоть ляцендть,
Нльне аф шерьхки усац.
И стама цебярь он мон няень:
Кажнайсь пяк дивандаль,
Винань аф кельгиське мяк симоль,
Скупой еврейське гривна максоль,
Штоба ваномс вестьке дивать;
Да черта с два!
Мон ванан; бта корож лии
Лугава, оцю ляй трвава,
Туста, туста вирень вельфке,
Крхка лотконь-латконь прява,
Кели, кели степонь эзга,
Шава паксянь вельфке;

И монга мельганза сонь тяфта
Лиян, прощандан модать мархта.

Свет, прощай, прощай тон, мастор,
Мялень кольфти, муцяф!
Монь страданьянень, урманень
Калмасайне дуцяс.
Тейть беседас, Украина,
Павазфтом удава,
Карман лиендема тейть мон
Дуцяста лугава,
Штоба корхнемс канзедезне,
Совет тиемс мархтот,
Пяле веста прашендома
Карман расать мархта.
Корхнетяма, канзедтяма,
Шить учсаськ минь стяма,
Мзярда кеподихть тонь иттне
Дружна врагть люпштама.
Ну, прощай, прощай, роднойняй,
Беднай тон удава!
Касфтыть иттнень; живой правдась
Шкайть пацянзон ала!

Лиян... и валдашкоткшни, няйса,
Менельсь виреть тейса
Крвязсь; цёфкскясь шинять васьфни
Шобда рощать эса.
Цють-цють келес вармась уфси,
Степне сетьмость ёфси,
И исатне пруттнень вельксса
Пижелготкшнихть, тошксихть.
Эше саттне шерьфтсть кудряснон,
Кайгсть нармонень морхне,
Часовойкс вольнай топольхне
Ванцть, паксяти корхнесть,
Сембось тя, тя сембе масторсь
Ашкотф мазишиса,
Пижелготкшни, мелкай, ару
Расаняса шни сон;
Эшелякшнезь шинять васьфни,
Савор шинек-венек
Касы, и аф муви тянди
Аф ушеткс, аф певок.
Сяда аф цебярьгофтсы кивок
Тянь и афи срафтсы,
И тя сембось... Седи, мезсь, азк,
Потмоцень ризнафтсы?

Мезенкса напрасна, сюдуф,
Сельмоветтнень прафнят?
Мезе ни ужяльдят?
Или ашить няй,
Или аф кульсак народсь кода урьняй?
Варжакстт лацкас. Мон жа кеподян пяк вишкста
Вири, сенем дуцять мон пштидян эшкскас:
Тоса властьке аяш, аф шавондыхть ломатть,
Рахсемат аш, аяш сельмоведень оматт.
Райса, конань кадат, сединязе, ванка,
Каяфтыхть калекать, беднайть, лафту лангста
Калада суманнянц кеднек валхтыхть сянкса, —
Князь лефкскятнень аяш лангозост няк щамсна.
Вов удава муцяйхть, беднайть пиксыхть сянкса,
Мес оброк изь панда, цёранц эса кшниса
Тярдедихть. Надеждац ащесь тяконь лангса.
Паньцазь сонь солдатокс... Вай, аф ули шиса!
Вона плятень ваксса таргозьф шаба кулси,
Тядяц баярть паксянц нуй, аф няйсы-кульсы.
Вона — няйсак? сельмот, сельмот!
Нейхтяда мес? Шабакс
Пингстон мес ашеде пяярь
Сельмоведень шадокс?
Перяфть ваксса ава иденц,
Аляфтомнять, вани;
Панезь беднайть аляц, тядяц,
Ломаттневок панихть;
Кивок ширенза аф ваны...
А барчуксь юкстазе:
Стирень комозце ни ваймоть
Симозе, лункфтазе.

Няйсы шкайсь ли дуцять вельксста
Горяньконь, нужаньконь?
Хоть и няйсы, максы лезкска,
Кода сире панттне,
Конат лама кизот-тялот
Ломань верса валонтфт!..

Беднай седизе, тонь мархтот
Стака эрямс каньксса!
Кяжи ядта минь сиптяма,
Удотам эй лангса,
Думоньконь кучсаськ минь шкайти,
Кизефтсаськ сонь эста:
Или ламос зверь палачне
Муцяйкс улихть светса?
Думозе, тон лийхте, лийхте кяжи мука!

Сявить тон эсь мархтот сембе кяшнень, каньксть,
Ялгаснонга сембонь. Йотксост серьце кассь.
Тон синь мархтост кельксеть, ванекшнедязь муцяф,
Кяжи кядьсост синь вов; сявить лиезь, архт
Сембе менельть эзга синь ордаснон срафтк!
Модать шобдась вельхтясы катк,
Толсь плхтасы, кяжись,
Яду куйхть лийкстайхть катк, модать
Ловажаса кяшсазь. ^[2].
Тоньфтемот жа седизень мон
Козовок ни кяшса.
Модать крайс лиян мяк вишкста,
Пади райть мон вешса?!
И танга, вярян, арьсезь тяфта,
Лиян, прощандан модать мархта.
Стака калада кудс кадомс,
Йордамс тядясь каньксти,
Нинге сяда стака няемс
Сельмоветтнень, панкснень.
Лиян, уфай валомне вармась,
И ловня акшелдома кармась.
Перьф пяльге вирьхть, болотат ащихть,
И, мярьгат, синь туманца шаштыхть.
А ломантть страшнай пильге кинза
Аф няйвихть, бта ашет синь...

Прощайте, вракт и ялгат тинь!
Прощайте! Аф молян мон инжикс.
Симондеда, пиравада!
Аф кульхтядязь тяса.
Век уема карман ськамон
Ловонь фальхнень пряса.
Ломатть, мзярс тинь ашесть сода
Вов тя масторть нинге,
Конац верса апак валонт,
Ваймамс цебярь пингсь тя.
Вайман мон ...
Но вов кулян ни
Кайгихть цинзерхт тяса,
Модать ала. Ванан... сквернай
Родсь минь кандаласа!
Коста эвондать тон? Коста?

Вешендят тон мезе
Модать ала? Аф, наверна,
Менелиге прязе
Аф кяшеви. Мес жа муцяйхть?
Мезенкса страдандан?
Кинди кальдяв тиень? Стака
Кядец кинь, аф стряндан,
Пингодсь ваймозень монь кшниса,
Седизень макссь толти;
Эвфтезень монь думнень,
Кода чавка полконь?
Аф содаса, мес тяшкава
Наказандайхть эсон?
Мзярда воляс мянян? Мзярда
Муканень сай песна?
Аф кульса, аф няйса.

Шерьхкозевсь пустынясь, зярнясь,
И, тесна лазксонь эзда, мярьгат,
Снихть илядыкс страшнай суду
Правдать инкса кулот, сюдофт.
Синь аф кулот, апак калмакт,
Анамс суд аф арьсихть;
Ломатть тяса, живой ломатть,
Цинзерса синь каркссефт,
Золод варяста синь тарксихть,
Штоба жаднайть марсемс
Эчке зепонц. Каторжатт нят!..
Мезенкса? Тянь азсы
Шкайсь. А пади нльне сонга
Менельста аф няйсы!
Вов злодей, клеймаса тяштьф сон,
Кандаласа моли;
Вов разбойник, плетьса пикссеф,
Пеензон сон пори,
Куломс апак шафт эсь ялганц
Шавомс, печкомс ёрай.
Етксост кяжихнень щаф-каряф
Кеме кандаласа
Миронь, воляшинь оцязорсь,
Венцяф сон клеймаса.
Каторгаса, пильгс аф комси,
Аф куфци, аф олькси.
Пара мяльса весть эждьф седись, —
Мзярдовок аф кельми.
Косот мяльхне, морхне, розовай тонь панчфне?
Эрек, кельгом иттне, удалафста шачфне?
Кельгом ялгай, кинди максыть синь? Мзярда?

Или пади мяштезт векозт прдайть-сярдяйть?
Тяйть кяшенде, брат, синь. Срафтыть келес видить,
Мзярдовок синь касыхть, арайхть эсьтейть идикс.
Нинге якамс, или саты?
Саты, якшамсь муцяй эсон;
Якшамсь ённень стяфты.
Лиян мон танга модать велькска,
И мяльне нувсихть, седись ризфса.
Ванан: кутт монь алон ащихть, —
Лама церькав мархта ош тя,
А ошть эзга каргокс якайхть
Солдатт, муцяфт, кефнень тапайхть:
Сембе топодьстот, щафт-каряфт,
Сембе кандаласа карькссефт,
Тонафнихть... Мон ванан, няйса, —
Ровна вастса оцю шяйса
Ош няеви, лоткса, мярьгат;
Велькссонза сонь дуцякс тярьготьф
Туман стака... Пачкодень мон, —
Ошсь пяк оцю, пефтема сон.
Или сон турецкяй?
Или сон немецкяй?
Пади нльне сон и русскяй!
Церкафт, терепт всякайхть,
Эчке баярхт якайхть,
Фкявок куд аф няят тяса!
Шобдалгодсь вов, и перьфпяльге
Валда толхт юрназевсть, —
Ронгозе зрназевсь, — „Ура! Ура!
Ура!“ — вайгяльхть зярнясть.
„Цыц! Тинь арьседоза, глупайхть!
Мезень тейнть радость?
Мес палхтада?“
„Эх, тон, хохол!
Аф содат парадть тон!
Парадоньке. Соньцке тяни
Симондемда мярги“.
— „Коса сон, ся налхкшкясь, куклась?“
— „Вов, дворецса, вяре“.
Эцян инголи, — спасиба
Украинец, олвань пуня,
Вайгяль тяса тейне макссь;
— „ Эвондать тон тяза коста“?
— „Украинаста“ .
— „Да кода тон
Московскяйкс
Корхтамонга аф маштат!
— А мон: „Ну, аф,

Корхтама мон маштан,
Аньцек ни аф ёран.
— „Эх, тон чудак!
Сембе васттнень содан:
Мон вдь тяса служан;
Кда мяльце, и дворецу
Вельдон кодавок суват,
Но содасак, минь вдь тяса
Просвещеннайхтяма, брат.
Скупой тят уль, сват, макст полтиннай!
— „Цюр тейть, цюр, противнай!“
Лиме-сюне“! —
Вов и меки арань
Аф неяви ломанькс,
Дворецу эцень эчкнень вакска.
Кормилецкяй, шкабаваскяй!
Вов райсь коса. Золодса ни
Валонтфт аф ужяльдезь
Шаванолайхне. Вов сонцьке,
Сери, ваны кяжде,
Корхтай. Вакссонза рьвацка:
Ломанць мазы сонга,
Сери сярьхкя и шуваня,
Кода коське панга;
Беднайсь нинге прянянц шерьфти,
Кафта шири ёряй. —^[3]
— „Так вов тя самай богинясь?!
Горя мархтот, горя!
А мон, глупайсь, тонь вов куклать
Вестьке апак няенть,
Виршань карайхненди кемонь!^[4]
Эх, и тувонь нярьхть синь!
Шава прян! Да шавфан нинге!
Верондань вал вельде
Мон москальти! Вов и лувить,
Кемить сяда меле!
Шкайхнень эшксса — куя баярхт
Золодсот, сиясот!
Андонь тувот бта ащихть,
Ляксихть, пушкснихть тяса.
Эцихть, ливозьсна мяк кольгихть,

Штоба шкайхнень малас
Сяда арамс пади каяйхть,
Или фига паламс
Максыхть; пяленя хоть, аньцяй,
Пакшкя стак, но поволь
Шалхка алу аньцек.
Сембе ряцок-ряцок арсесть,
Кяльсна бта керсефт,
Кашт аф молихть. Оцю азорсь
Кяленц аньцек нефти,
А рьвац сонь мчкарганокс
Комотни, прянц няфни.
Ламос кафонест синь якасть,
Кода корошт гордайхть,
Фалу мотердсть, ашезь маряв
Ичкозде месть корхтасть,
Отечествать колга пади,
Или пади мотердсть
Од петлицань, муштрань колга.
Тоса, апак каштордт,
Азоравась озась. Ванан:
Оцю азорсь саста
Нежедсь самай оцють малас,
Да нярти кодак стасы!
Нолазень трванзон беднайсь,
Да сяда ёмлать пекти. —
Мяк увназевсь! Тона сяда
Одонь кодак петьсы
Церямкати: тона — ёмлать,
Емлась — однять сяда,
Тона аньцяйнятнень, конат
Тяста лиссть ни, стадакс.
Кодак кеподсть городть эзга,
И давай синь тялямс
Православнайхнень, муцяфнень!
Нонат, апак мяляфтт
Пешкодыхть... кодак ивадихть:
— „Шутендай минь батюшканьке!
Ура, ура, ура-а а-а!“
Рахань пяк ни, саты моньге
Люпшнемазь, муцямазь.
Позда, заря лангс ни сембе
Матодовсть, сутямомсть;
Православнайхть аньцек тяса
Уженява куфцесть,
Оцю азорть инкса шкайти
Эняльдемат кучсесть.
Сельмоветтне шудихть, рахат!

Мон ошть эзга якан.
Весь шикс ащи валда. Ванан:
Сери пяк палатат
Ащихть сетьме ляйнь ваксса,
Берякне стафт кевса.
Дивадондан и эсь прязень
Мон нльне аф кемса:
Кода тя жа сембе тиевсь
Аф ётамшка шяйть лангс?
Чуда тя! Вов коса шудефтьф
Ломанть вероц ляйнякс,
Пеельфтема. Ляйть омбокса
Крепость, колокольня, ^[5]
Пряц урня бта сонь оржа,
Страшна ваномс нльне.
Марян частт стукиихть тяса,
Омба шири шарфтонь, —
Арды лишме, пильгонц мархта
Кевонь панда срафты.
Лишмоть лангса ащи оцю
Кодама-бди ломань:
Свитаса или суманьца,
Прясонза круг лопань.
Тубушком стясь лишмось? — вот-вот
Комоти ляйть велькска,
А сон венептезе кяденц,
Мярьгат, ёрай нельгомс
Сембе мирть. Да кие тяфтамсь?
Кевть лангс сёрматф кафта
Валхт мон мяльшазь лувонь тяфтапт:
„Васенцети — омбоцесь“ ^[6]
Стяфтозе вов тяфтам чудать,
Тяни тейне содаф:
Васенцесь — тя мучендакшнесь
Беднай Украинать,
Омбоцесь мяк ваймонц таргась
Беднай сиротинать.
Ломань сивихть, ломань шавихть!
Грабседе тинь фалу.
Лопняде, а мезе мархтонт
Сявовсь модать алу?
Тошна, мярьгат, Украинать
Горянзон, нужанзон

Колга книга лувондан мон,
Ащан и лужадан.
А ся пингста сетьмоняста,
Савор, ужаняста
Кати кие морась тяса:
— „Ошста, Глуховаста молихть
Ичкози, границав
Кайме мархта полкт пяк лама,
А монь сей, столицав,
Кучемазь казакнень мархта
Наказной гетманокс.
Ох, тон, шкайньке минь добрай!
Оцязор поганай !
Оцязор проклятай, жаднай,
Инекуй, лукавай !
Лангсост казакнень наругать!
Шавонтфтыть, муцяфтыть.
Ломань пакарьса шяйхть калмать,
А столицать стяфтыть
Ловажаснон лангс муцяфнень,
Шобдаса, тюрьмаса,
Вачашиса вольнай гетманть
Муцяйть кандаласа. ^[7]
Оцю азор, оцю азор!
Минь аф судендафтам
Мархтот эстейнза шкайти!
Фкя фкянди кундафтам
Кандаласа. Невать вельксса
Лиендемс пяк стака.
Пади вастоцка ни аяш
Украина акать.
Молелень ба, ванолине,
Шкайсь аф мярги. Горя!
Пади Москусь сонь плхтазе,
Днепрать сенем моряв
Нолдазе. Пади кургаттне —
Славаньке — шувфт-карафт,
Срафнефт? Кормилецкяй,
Тон хоть ширенк арак“!
Сембе сетьмось. Вов мон ванан:
Акша дуця валги,
Менельть кяши. Дуцять эса,

Мярьгат, зверь пяк ранги.
Тя аф дуця, — акша нармонь,
Бронзань оцю азорть
Вельксозонза валгсь сон дуцякс
И эсь правданц азондсь:
— „Инекуй, и миньге мархтот
Пинготьфтяма кшниса!
Жаднай, сельмингольдет шкайть минь
Кяшсаськ тона шиста,
Страшнай судса сонь прдасаськ.
Украинаста крхтапа
Панемасть минь лову масторс,
Якшамса крхтамасть,
Ваткамасть, а кеттнень эзда
Веры багряница
Стать тон эстейть кеме санца,
Путоть тон столица
Кедень ризаса. Ну, ватт жа:
Церкафт да палатат!
Ну, кштик-морак, ломань шави,
Проклятай, проклятай“.
Сембе лийкснесть, сембе сраткшнесть;
Шись ни стяма кармась;
А мон дивандакшнень, нльне
Тейне страшна арась.
Сргозсть беднайхне, и трудс ни
Эряскадозь тушендсть,
И солдаттнень ни ульцява
Тонафнемост ушедсть.
Од стирнят ульцятнень эзга
Эряскадозь ётасть,
Но аф кудста синь, а куду...
Ве вешка работасть,
Паньцазь тядясна, — кшить колга
Тясть юксне заботать.
А мон ащан, комань алу,
Арьсян, думондакшнян:
— Кшись народти конашкава
Трудна добувакшнемс!
Прафтсь вов братиясь сенату
Тяшнема, штоб взяткат
Аляснон и братснон ширде
Ламня норгомс, ваткамс.
Монь земляконе синь ётксост
Тяса-тоса, конат
Шапихть рузкс и тряйснон сюцихть,
Рахайхть, сясь мес нонат
Нинге идькс немецкяй кяльти

Козянь иттнень мархта
Ашезь тонафне, — а тяни
Краскаса вов архнефт...
Педлийхть! Алянте мизь, пади,
Траксснон стака мяльса,
Маштоледе корхтама штоб
Тинь московскяй кяльса.
Украина, Украина!
Иттне, мяштьсот антфне,
Йофси кольсть, черниласа ни
Валонтфт тонь од панчфне.
Опамфт немецонь парникса
Московицкяй кедьса^[8].
Авардть, идьфтема удава,
Кольгонть сельмоведьса!
Оцю азорть шири дряй ни
Варжакстомс дворецу,
Тиендихть месть тоса. Сань мон —
Тяса ащихть рядсок
Эчке баярхт мзнайхть, пркснихть,
Куркат бта тетьковсть,
Кенкшнень ширес салаване
Сельмоснон синь тетьксезь.
Вов и кенкшне панжевсть келес —
Оцю офта, мярьгат,
Варястонза лиссь. Цють шашты,
Бта аяш эрьгац;
Сенемгодсь мяк, станя таргозсь;
Похмелиясь моценц
Машфтозе. Сон кодак рангстай
Сембодонга оцю,
Эчке пекнень лангс, а нонат
Модав эцесть, вачкавсть.
Тетькозень сельмаванянзон,
Сембе нльне вачкатсть,
Кит илядсть. Сон пяляс пинекс
Елматнень лангс увси, —
Синьге кяшсть. Сон анцяйхнень лангс. —
Сятка вишкста юмсихть;
Сон слуганзон лангс врьгятсь ни, —
Нятка модав сувсесть;
Прафтсь солдаттненди — солдаттне
Сембе аньцек куфцесть,
Модав тушендсть. Белай светса
Тиевсь ну и дива!

Ванан пинге, мезе ули,
Офтонязе дикайсь
Мезе танга тии. Ащи,
Нолдаф алу нярец.
Ох, тон беднай! Ков имась жа
Офтонь ёнец, кяжец?
Кода ката лефкс, и чуднай!
Рахамс савсь мяк тейнек.
Кулемань, да кодак рангстай, —
Эводень, маштсть вийне,
Сыргозень мон...
Вов кодама
Онцтон няень дива!
Тяфтапт няйнкшнихть вов аньцек
Комлявсь, юродивайсь.
Тяда дивандакшке пяк ни
Кельгом братьят; тя вдь
Аф эсь прястон арьсеф, няень
Тяфтама он тя веть.

1844  кизонь  июльть  8-це   шистонза.    С.-Петербург.

Рузонь  кяльста  ётафтозе  Андрей   Чекашкин.

 

---

 

---

1. „Он“ поэмась ащи Шевченкоть сяда яркай революционнай произведениянзон лувксса. Арестть пингста 1847 кизоня муф „Сон“ поэмась служась прямой уликакс, таргась эсь мельганза суровай приговор. „Комедия“ подзаголовкать Шевченко максозе, штоба няфтемс, што тя поэмать целец пощадафтома бичевандамс эксплоататорскяй стройть.
2. „Кда модать лангса тяшкава лама кяжда, кда аш правда, кда беднякть лангста каяфнихть остатка суманнянц и муцяйхть оброконкса удавать, то катк лучи модать тавадсы шобдась, катк плхтасы сонь юрнай толсь, катк тонга, кода древняй шитнень пингста, мифическяй куйсь тиенди расправа ломаттнень лангса“. — Куйть образоц сявф библияста, кода и сембе наказандамань сценась, конац тяса няфтьф
3. Кода содаф, Николай I рьванц Александра Федоровнать шамац сярядсь нервнай урмаса (сярятькстсь эводемать эзда декабрьскяй восстаниять пингста). Маркиз де Кюстин эсь записканзон эса сёрмады, што „Нервнай конвульсиятне тиендезь безобразнайкс сонь шаманц, кошарязь сонь кой-коста нльне трнафнемс прянц“.
4. Кальдяв стихонь сёрмадыхненди.
   Шевченкось тяса корхтай поэттнень аристократтнень колга, конат аф весть шнакшнезь Александра Федоровнать мазышинц.
5. Знаменитай Петропавловскяй крепостсь, конань одиночканзон эса мучендасть заключенай революционерхне, конатнень озафнезень тяза царскяй правительствась.
6. Надпись, Петр I памятниконц лангса, конань тифтезе Сенатскяй площади, Екатерина II.
7. Шевченкось воспроизводил Павел Полуботко наказной гетманть колга легендать. Оцязорсь Полуботкати макссь подарканди кафта тёжятть крепостнон ломань, и сон арась фкя инь крупнай помещикокс. Полуботкась Петр I пингста аралакшнесь казацкяй эксплоататорскяй верхушкать интересонзон. Шевченкось тянь ашезе сода и Полуботкать няфнезе идеализированнайста.
8. Шевченкось ёрасы азомс, што империять шовинистическяй политикац калечендакшнезе од поколениять, отравляндакшнезе сонь „московскяй беленаса“ презренияса родинати, родной кяльти.

 

This is a translation and has a separate copyright status from the original text. The license for the translation applies to this edition only.
Original:
Translation: